Nagpadala sang sulat ang Iloilo 1 Electric Cooperative, Inc. (ILECO) sa Energy Regulatory Commission (ERC) agud nga imbestigaran ang line rental sang National Grid Corporation of the Philippines (NGCP).
Sa interview sang Bombo Radyo kay Engineer Mike Paguntalan, General Manager Iloilo 1 Electric Cooperative, Inc., iya ginpahayag nga ang rate sang nagligad nga bulan sang Mayo ang yara lamang sa P10 tubtob P12 per kilowatt, samtang sang Hunyo naman may yara sang P10.13.
Suno kay Paguntalan, nagmandu ang Energy Regulatory Commission sa ila nga amo nga bili sang kuryente ang “staggered” sa sulod sang apat ka bulan.
Ginpahayag man sini nga ini ang nangin rason kon ngaa nagnubo ang bill sang Hunyo bangud ini ang una nga “staggered payment”.
Ang “staggered payment” ang isa ka opsyon sa idalom sang term plan, nga mahimo baydan sang monthly ukon annually.
Gin-athag man sang natungdan nga ang bill sa bulan sang Hulyo ang nagsaka bangud natingob ang bayad sang isa ka staggered payment sa spot market kag nadugangan pa sang pagtaas sang rental line sa National Grid Corporation of the Philippines.
Ginklaro man sang ILECO 1 nga wala sila sang control sa pagsaka sang bill sang kuryente nga bisan sila ang nagakwestyon man.
