Nagapati ang presidente sang SM Engineering Design and Development Corporation nga may mga unpopular decisions nga dapat himuon sa pag-renovate sang isa ka istruktura.
Ini kasunod man sa kontrobersyal nga pag-demolish sang Iloilo Central Market.
Sa interview sang Bombo Radyo kay Han Sy Jr., Presidente sang SM Engineering Design and Development Corporation, iya ginpahayag nga sa iya eksperyensya sa field may mga bagay nga kinahanglan ubrahon apisar pa nga indi ini luyag sang iba.
Suno kay Sy, bilang isa tagapamuno ukon leader, importante man ang mangin accountable kag transparent sa tagsa ka desisyon.
Gin-athag man sini nga wala sila sang intensyon nga magguba sang cultural properties kag values.
Ginpasiguro man sang natungdan nga ubrahon nila ang ikasarang sang korporasyon agud nga mapreserba ang kultura kag importansya sang isa ka istruktura.
Ini kasunod man nga napabilin sang korporasyon nga ma-preserve ang historical value sang Molo Mansion paagi man sa renovation.
