Ginalauman sang Schools Division Office (SDO) Iloilo nga masumiter na sa Lunes ang verification report sa performance sang Grade 9 student nga nagdala sang iligal nga droga sa sulod sang campus sang Abangay National High School sa Janiuay, Iloilo.
Sa interview sang Bombo Radyo kay Mr. Leonil Salvilla, Information Officer sang Schools Division Office Iloilo, iya ginpahayag nga hatagan sang psychosocial support and intervention ang solterito sa bulig man sang Municipal Social Welfare and Development Office (MSWDO).
Suno kay Salvilla, ginpaidalum na sa alternative delivery modality ang pagtuon sang bata, kon sa diin, ginaplano man sang eskwelahan nga hatagan sang reorientation ang classmate kag tanan nga mga estudyante agud ma-intensify ang programa batok sa iligal nga droga.
Gin-athag man sini nga sa subong, magapadayon sa gihapon sa pagtuon ang solterito samtang ginapaidalum sa psychosocial support and intervention.
Nahibaluan nga nakuha sa Grade 9 student ang iligal nga druga matapos ginrekisa sang iya manunudlo sang makabaton ini sang impormasyon nga may estudyante nga may dala nga kutsilyo pasulod sa eskwelahan kag didto na nakita ang isa ka sachet sa iya nga medyas.
Nagnegatibo naman sa drug test ang estudyante kag ginturn-over sa Municipal Social Welfare and Development Office (MSWDO) apang ginbalik man ini sa iya pamilya.
