Nagaguwa nga daan nga hiligut-anon kag away sa duta ang rason sang insidente sa Barangay Imbaulan, Lemery, Iloilo kun sa diin gintiro ang traysikol nga may sakay nga apat ka mga tawo.
Natabo ini kahapon sang kaagahon kun sa diin manugpauli na kuntani sa ila balay ang mga indibidwal edad 53 kag 46-anyos kaupod ang duha ka mga menor de edad.
Sa interview sang Bombo Radyo kay Police Captain Jose Winston Biadog, hepe sang Lemery Police Station, iya ginpahayag nga sang yara na sa alagyan nga napalibutan sang katubuhan ang traysikol, didto na kag may nagluthang sang isa ka bes apang maswerte nga wala sang naigu.
Nagpondo ang traysikol kag nakit-an pa ang ginatudlo nga suspek apang nagpalagyo.
Sa bulig sang barangay officials kag mga pulis, nadakpan ang ginatudlo nga suspek nga ginapahayag nga indi man gid malayo nga himata sang mga biktima.
Suno kay Biadog, nagapakatig-a sa pagkooperar ang suspek sa mga otoridad rason man nga wala man na-recover pati ang armas-luthang nga gingamit sini.
Nagapabilin sa kustodiya sang pulis ang suspek kag napasakaan naman sang reklamo nga attempted murder.
