Nagpaathag ang San Dionisio Fire Station kon ngaa wala nakaresponde ang ila nga firetruck sa nagluntad nga sunog sang Setyembre 7, sa Brgy. Poblacion, San Dionisio, Iloilo.
Partially burned ang isa ka balay nga ginapanag-iyahan sang pamilya Estrella, samtang ginabanta nga yara sa P72,000 ang balor sang kahalitan.
Sa interview sang Bombo Radyo kay Senior Fire Officer IV Rodel V. Balindua, Acting Municipal Fire Marshal sang San Dionisio Fire Station, iya ginpahayag nga Agosto 30, na-flat na ang duha ka royda sa pang-ulihi sang ila firetruck kag natabo pagid ini liwat sang Setyembre 4.
Suno sa natungdan, gilayon nagpahibalo sila sa pumuluyo nga temporaryo nga unserviceable ang amo nga firetruck kag nagrequest sang anom ka mga goma sa ila LGU.
Dugang pa sini nga may pila pa ka mga dokumento nga ginakinahanglan, rason nga wala dayun nakuwa ang ila request nga mga goma.
Ginaekspektar naman nga sa buwas nga adlaw, maabot na ang ginrequest nila nga mga goma.
Nahibaluan nga sang natabo ang insidente, nangayo ang talatapan sang bulig sa Sara Fire Station nga amo ang nagresponde sa sunog.
