Gin-anunsyo sang Princess of Wales nga si Catherine nga natapos na sini ang chemotherapy treatment kag magahagan-hagan na ang iya schedule sang engagements tubtub sa katapusan sang tuig.
Sa isa ka video message nga ginpaguwa anum ka bulan matapos ginbulgar nga may yara siya sang cancer, ginpahayag ni Princess Kate nga ang ginatutukan sini amo ang pagpabilin nga cancer-free.
Ginpaguwa sini ang videos nila ni Prince William upod ang tatlo ka kabataan kun sa diin ginpahayag niya nga mabudlay ang katapusan nga siyam ka bulan para sa iya pamilya bangud sa iya kondisyon.
“As the summer comes to an end, I cannot tell you what a relief it is to have finally completed my chemotherapy treatment. The last nine months have been incredibly tough for us as a family. Life as you know it can change in an instant and we have had to find a way to navigate the stormy waters and road unknown,” pahayag ni Kate.
Gin-feature sa video ang ila pag-updanay sa pila ka mga lokasyon kaangay sang kagulangan, baybay, kag patag sa Norfolk nga isa ka county sa east sang England.
May clips nga isahanon siya sa video samtang may yara man nga kaupod sini ang manunubli sang trono sa Britanya nga si Prince William, amo man ang ila tatlo ka mga bata George, 11; Charlotte, 9; kag Louis, 6.
Ginklaro ni Kate nga bisan nakatapos na siya sa chemotherapy, malawig pa ang iya banas sa pag-recover kag atubangon niya ang adlaw-adlaw nga mga pagpanghangkat para sa iya pag-ayo.
“The cancer journey is complex, scary and unpredictable for everyone, especially those closest to you. With humility, it also brings you face to face with your own vulnerabilities in a way you have never considered before, and with that, a new perspective on everything,” dugang sini.
Matandaan nga Marso sang ginsapubliko sini nga na-diagnose siya nga may cancer kag pililion lang ang public appearances nga iya nahimo kaangay sang men’s final sa Wimbledon sang Hulyo.
Sang Hunyo, nagtambong man ini sa Trooping the Colour nga isa ka ceremonial parade nga nagaselebrar sang official birthday sang British monarch.
Ang pagka-diagnose kay Kate nga may cancer ang natabo masobra isa ka bulan lamang matapos gin-anunsyo sang Buckingham Palace nga ang iya ugangan nga si King Charles III ang may kaangay man nga kondisyon apang wala na gindetalye kun ano ini nga sahi sang cancer.
