Nag-qualify ang Filipina tennis ace nga si Alex Eala sa main draw sang Women’s Tennis Association (WTA) 500 event sa labing-una nga tion sa iya karera.
Nalab-ot ini ni Eala matapos ginlutos si Samantha Dawn Murray Sharan sang Great Britain, 6-4, 6-2, sa last round sang qualification sa 2024 Guadalajara Open Akron sa Mexico.
May isa ka adlaw pa para sa 19-anyos nga Pinay nga makapahuway kag practice antes sini atubangon sa opening round sang tournament ang sixth seed nga si Marie Bouzkova sang Czech Republic.
Underdog si Eala nga yara sa world no. 147 samtang world no. 45 naman si Bouzkova.
Nadag-an ni Eala ang US Open girls singles sang 2022, samtang ang 26-anyos naman nga si Bouzkova ang isa man ka former US Open girls singles champion nga nagdala pauli sang junior grand slam trophy sang 2014.
Ini nga Czech ang nakasambuwa na kag nakalutos pa sa pila ka best players lakip na ang recent US Open champion kag world No. 2 Aryna Sabalenka, No. 3 Jessica Pegula, No. 6 kag 2023 US Open champion Coco Gauff, kag world No. 11 Danielle Collins.
