Patay ang duha mga indibidwal samtang duha ang pilason kasunod sang pagbunggo-anay sang wing van kag mixer truck sa Barangay Calaboa, Leganes, Iloilo.
Ang napatay nga driver sang mixer truck amo si Fermin Gamarcha, temporaryo nga nagapuyo sa Brgy. Cali, Dumangas, Iloilo kag residente sang Sibunag, Guimaras.
Ang driver naman sang wing van amo si Ryan Ramos, residente sang Sta. Barbara, Iloilo.
Ang pahinante sang wing van amo sanday Jomar Sonza, residente sang Sta. Barbara, Iloilo kag Niño Miranda, residente sang Brgy. Tamocol, Badiangan, Iloilo.
Sa interview sang Bombo Radyo Iloilo kay Police Master Sergeant Leo Barnuevo, imbestigador sang Leganes Municipal Police Station, iya ginpahayag nga samtang ginabulong si Gamarcha sa ospital, nagtaliwan ini tungod sa fatal injury nga naagum sa ulo.
Samtang yara na sa estable nga kondisyon ang driver sang wing van kag isa ka upod sini nga pahinante.
Nahibaluan nga ang wing van ang naghalin sa banwa sang Zarraga, Iloilo kag padulong kontani sa syudad.
Samtang ang mixer truck naman ang naghalin sa Leganes kag padulong kontani sa Zarraga, Iloilo.
Suno kay Barnuevo, sang nag-abot na ang wing van sa dalan sang Calaboa, Leganes, naglupok ang goma sang wing van kag ginkabig sang driver pa-wala rason nga nabunggo-an sini ang nagapadulong nga mixer truck.
Gintumod man sini nga posible nga madasig ang dalagan sang wing van rason man nga tuman ka baskog ang impact sini sa mixer truck.
Nahibaluan nga nawasak gid ang unahan nga porsyon sang wing van kag mixer truck matapos nga nagluntad ang insidente.
Padayon naman nga ginatumod sang otoridad kon sin-o ang pangalan sang pahinante nga ginbawian sang kabuhi bangud wala sang may nakit-an sa iya nga identification card (ID).
