Patay ang driver sang motorsiklo matapos nadisgrasya malapit sa taytay sa Barangay Ticud, La Paz, Iloilo City kagab-i, Septyembre 11.
Patal nga pilas sa ulo ang naangkon sang biktima, nagakulob na sa dalan kag wala nagahulag sang naabtan sang mga tawo, kag naglapta man ang dugo sa lugar kun sa diin natabo ang insidente.
Gilayon pa ini nga gindala sa West Visayas State University Medical Center apang gindeklarar nga dead on arrival.
Base sa inisyal nga impormasyon, pakadto sa Baldoza, La Paz ang direksyon sang biktima.
Nakuha sa iya possession ang Identification Card nga nakapangalan kay Erwin Parcon sang Barangay Barasan, Pototan, Iloilo apang gina-verify pa ini sang otoridad.
Sandig sa dugang nga pagpangusisa, may mga impormasyon nga madasig ang dalagan sang motorsiklo. Wala pa natumod kun hubog ang biktima.#
