Pilason ang isa ka lalaki matapos nga ginlabo sang senior citizen sa Cabugao Viejo, San Enrique, Iloilo.
Ang biktima amo si Florencio Gamarcha Tacaisan,56, residente sang Paga, San Enrique samtang ang suspek amo si Salvador Paclibar, 60,residente sang Cabugao Viejo sa amo nga banwa.
Sa interview sang Bombo Radyo kay San Enrique Municipal Police Station Officer in Charge Police Lieutenant Cristyval Dalde, iya ginpahayag nga antes ang insidente, nagbaisay ang suspek kag ang biktima.
Suno kay Dalde, yara sa impluwensiya sang makahulubog nga ilimnon ang suspek.
Matapos ang krimen, gilayon nga nalagyo ang suspek kag padayon pa nga ginapangita sang otoridad.
Pilas sa likod nga bahin sang liog ang naangkon sang biktima nga padayon nga ginabulong sa ospital.
