Ginpa-Bombo sang mga residente sang Barangay Sinikway, Lapuz, Iloilo City ang halos kapin tatlo na ka semana nga wala nagatubod ang tubig nga supply halin sa Metro Pacific Iloilo Water (MPIW).
Sa interview sang Bombo Radyo kay Alyas Ivy, residente kag konsumidor sang Metro Pacific Iloilo Water, iya ginpahayag nga bilang nagapanag-iya sang refiling station tuman gid ka apektado ang ila negosyo bangud mas doble ang iya nga ginabakal nga tubig nga ibaligya.
Suno kay Ivy, sugod sang Marso naglain-lain ang schedule sang pagpatubod sang tubig sang nasambit nga water distributor, kon sa diin, wala na nagatubod ang sugod sang tunga-tunga sang Agosto tubtob subong nga bulan sang Setyembre.
Ginpahayag man sini nga indi lang ila nga negosyo ang naapektohan bangud halos tanan nga may yara sang commercial building.
Gintumod man sang natungdan nga sang ginkadtuan sang Metro Pacific Iloilo Water ang ila lugar, nagsiling lang sila nga “wala ta sang may mahimo”.
Apang, ila man nga ginrason nga may ginakay-o sila nga mga guba nga tubo.
Ginreklamo man ni Ivy ang ila nga bill bangud amo sa gihapon kag mas nagataas pa apisar nga ang nagatubod ang color brown na.
Gintumod man sini nga masami sila nga naga-flashing sang isa tubtob duha ka oras antes nga magsinaw ang tubod sang supply sang ila tubig.
Matandaan nga sang nagligad nga tuig, nagpa-Bombo man ang mga residente bangud sa kaangay nga problema.
Ini ang nagtulod man sa Metro Pacific Iloilo Water agud nga solusyanan ang problema, apang suno sa mga residente, pananglitan lamang nga nagtubod ang ila tubig kag liwat nga nagbalik sa tulo-tulo nga pagtubod.
