Ginalantaw ni Executive Assistant to the Mayor Raisa Treñas-Chu nga alyansa ang ginpakita nga suporta ni former Iloilo City Mayor Joe Espinosa III.

Ini kasunod man sang pagkitaay ni Iloilo City Mayor Jerry Treñas kag sang anay nga alkalde.

Sa interview sang Bombo Radyo kay Ms. Treñas-Chu, iya ginpahayag nga nalipay siya sa ginpakita nga suporta ni Espinosa sa ila nga grupo.

Suno kay Treñas-Chu, ikatatlo na nga kahigayonan nga nagkaupod si Espinosa kag ang amay sini, kon sa diin nangin maayo ang ila nga pagtamdanay.

Ginpaathag man sini nga coincidence lamang nga na-post ang ila mga laragway kadungan man sang pagpauli ni former Iloilo City Mayor Jed Patrick Mabilog sa Pilipinas.

Gintumod man sang natungdan nga duha ka semana nga nagplano ang ila nga pamilya nga magkit-anay antes paman nga nag-abot si Mabilog.

Ginaabi-abi man sini ang pagbalik ni Mabilog sa Pilipinas bangud para sa iya, ini ang isa man ka kahigayonan agud nga maklaro ni Mabilog ang iya pangalan nga ginaangot sa iligal drug trading.

Gin-ako man ni Treñas-Chu nga mas maayo kon makaistorya si Mabilog kag ang iya nga amay bangud sila ang madugay naman nga mag-abyahanay.