Ginklaro sang kampo ni anay Iloilo City Mayor Jed Patrick Mabilog nga wala pa ini sang plano nga magbisita sa Iloilo subong nga adlaw, Septyembre 13.
Sa interview sang Bombo Radyo kay Atty. Jeric Jucaban, legal counsel sang former mayor, iya ginpahayag nga may plano matuod si Mabilog nga magpauli apang wala pa sang eksakto nga adlaw kun san-o gid ini.
Suno kay Jucaban, pananglitan magpauli gid man si Mabilog, magabisita ini sa Iloilo City Hall apang wala sang klaro suno sa iya kun personal ini nga magabisita kay Iloilo City Mayor Jerry Treñas.
“Whether mabisita siya kay Mayor Treñas, wala pa sang klaro sa akon. Amo lang na ang hambal ya nga mabisita siya kuno sa City Hall. Indi pa ako maka-confirm whether that visit will also include a personal visit to the city mayor of the City of Iloilo,” paathag sang abogado.
Ginplastar man sang legal counsel nga sa iya ihibalo, nagapabilin man nga mag-abyan sanday Mabilog kag Treñas.
“As to their relationship, ang pagkabalo ko, they remain as friends but I’m not sure kun naga-istoryahanay sila nga duha,” dugang sini.
Matandaan nga si Mayor Treñas man ang nakamuno nga posible magpauli subong si Mabilog base man sa inisyal nga impormasyon nga ginpalab-ot sang iya anay executive assistant nga si Mr. Jeck Conlu.
Nahibaluan nga malawig man nga magkaalyado sa pulitika sanday Mabilog kag Treñas. Nagpadalagan sila sa pareho nga slate — si Treñas bilang congressman kag si Mabilog bilang mayor kag nagdaog sa eleksyon sang 2010, 2013, kag 2016.
Si Iloilo City Lone District Rep. Julienne Baronda naman amo ang nagsugat kay Mabilog sang nag-abot ini sa Pilipinas halin sa Estados Unidos sang Amerika sang Martes, Septyembre 10.
May matunog subong nga espekulasyon nga posible magbalik sa pulitika si Mabilog ilabi na kasunod sang kumpirmasyon nga nagpa-reactivate ini sang iya voter registration.
Pananglitan magbalik sa pulitika, matunog man nga gina-istoryahan sang publiko nga posible maka-tandem sini si Baronda. Si Baronda kag Treñas ang una na nagkumpirma nga nag-separar na sa pulitika para sa upcoming elections.
Wala pa sang kumpirmasyon halin sa kampo ni Mabilog kag Baronda kaangot sa sini nga isyu sang posible alyansa.
PAGBALIK SA PILIPINAS
Matandaan nga nag-abot si Mabilog sa Ninoy Aquino International Airport sang Martes matapos ang pito ka tuig nga pagpuyo sa Estados Unidos sang Amerika.
Insigida ini nga nag-surrender sa National Bureau of Investigation (NBI)-National Capital Region kag sa mga operatiba sang International Airport Investigation Division agud nga ma-submit ang kaugalingon sa legal proseso.
Kaangot ini sa arrest order sang Sandiganbayan 3rd Division kag Lapu-Lapu City Regional Trial Court Branch 73 batok sa former mayor bangud sa ginaalegar paglapas sa Republic Act No. 3019 ukon ang Anti-Graft and Corrupt Practices Act kag ang Code of Conduct and Ethical Standard.
Nagpiyansa ini gilayon kag nahatagan sang temporaryo nga kahilwayan matapos na-secure ang release orders halin sa Sandiganbayan kag sa Pasay City Regional Trial Court.
Agusto 2017 sang nagbiya si Mabilog sa Pilipinas matapos nga gin-tag ini ni Duterte bilang narco-politician” kag ginasapubliko pa sang former president ang pamahog nga patyon ini bangud ginatum-ok sini si Mabilog nga protector sang illegal drug syndicates sa Western Visayas.
Sang nagligad nga bulan, sa una gid nga hearing sang quad committee, nabukaran ang isyu kay Mabilog sang ginpahayag ni Baronda nga mahimo sini makumbinse si Mabilog nga magpauli sa Pilipinas kag limpyuhan ang iya pangalan amo man ang pagbansag anay ni Duterte sa Iloilo bilang “most shabulized city in the Philippines.”#
(Photo: JPM/Facebook)
