Naglab-ot sa 6,094 ka mga indibidwal ang naapektohan sang pagtaas sang tubig-baha sa probinsya sang Antique kasunod sang dala nga trough kag habagat ni Bagyo Ferdie.
Sa interview sang Bombo Radyo kay Broderick Train, head sang Antique Provincial Disaster Risk Reduction and Management Office, iya ginpahayag nga 1,831 ka mga pamilya ang naapektohan sa malain nga tyempo, kon sa diin, ang iban ang nagbalik naman sa ila nga mga panimalay.
Suno kay Train, apisar sang pagbalik sang iban nga mga residente sa ila nga puluy-an, may yara man sang iban nga nag-amat-amat man balik sa evacuation center bangud nagapabilin nga wala malimpyohan ang ila nga panimalay.
Ginpahayag man sini nga yara sa 18 ka mga banwa ang apektado baha ka landslides nga dala man sang habagat kag trough.
May yara man sang mga dalan nga naapektohan sang landslides, apang ang iban nga national road ang posible naman nga maagyan subong.
Gintumod man sang talatapan nga may na-record sila nga isa ka missing ukon nadula bangud nagbalik ini sa ila balay samtang naga-ulan-ulan agud nga magkuha kontani sang ila nga baka.
Tubtob subong wala ini nakabalik kag nagapabalin nga missing.
Nagpasalig naman ang talatapan nga preparado sila paagi sa paghatag sang nagakaigo nga impormasyon nahanungod sa malain nga tyempo.
Bukas man ang tanan nga evacuation center agud nga magtatap sa mga pamilya nga posible naapektohan sang pagbaha kag landslide nga dala ni Bagyong Ferdie.
