Stranded ang pila ka mga pasahero sa Parola Wharf nga magabyahe kontani padulong sa Guimaras kag Negros.
Ini kasunod man sang nangin epekto sang habagat kag trough sa Visayas nga dala ni Bagyo Ferdie.
Sa interview sang Bombo Radyo kay Reah Torres, isa sa mga na-stranded, iya ginpahayag nga may mga magagmay nga ferry boat ang wala na ginpahanugutan pa nga maglayag ukon magbyahe pa.
Suno kay Torres, madasig nga napuno ang mga ferry boat bangud madamo sang mga nagapauli ilabi na nga weekend.
Ginpahayag man sini nga tinghuwaan nila nga makapauli agud nga makaupod ang ila nga pamilya.
Nahibaluan nga temporaryo nga ginsuspende ang byahe sang mga sakayan-pandagat sa Parola Wharf bangud man sa mabaskog nga pag-inulan-ulan.
