Gin-athag sang Commission on Election (COMELEC) nga indi na makapa-reactivate liwat personal si Former Iloilo City Mayor Jed Patrick Mabilog sang iya nga voter’s registration.
Sa interview sang Bombo Radyo kay Mr. Jonathan Sayno, Election Assistant II sang Iloilo City Commission on Election, iya ginpahayag nga indi na pagbatunon sang ahensya ang registration sang anay alkalde kon magapa-reactivate siya liwat bangud nakapa-reactivate na ini via online.
Suno kay Sayno, kinahanglan nga hulaton sang anay alkalde ang approval sang COMELEC sa iya online registration bangud quarterly basis ini kag malakip ang aplikasyon ni Mabilog sa mga nag-apply man sugod sang Hulyo tubtob Setyembre 30, 2024.
Ginpahayag man sini nga kapareho man ang matabo sa mga nag-apply personal sa talatapan sang ila nga reactivation.
Gin-athag man sini nga gina-consolidate ang approval paagi sa election registration board sang talatapan.
Ginklaro man ni Sayno nga apisar nga pending ang reactivation sang anay alkalde, sarang siya sa gihapon nga maka-file sang iya nga certificate of candidacy (COC) pananglitan nga magadalagan ini sa 2025 elections.
