Natigayon na nga makita ang isa ka indibidwal nga na-missing sa Pandan, Antique kasunod man sang mabaskog nga pag-inulan-ulan sa probinsya nga dala ni Bagyong Ferdie.
Una na nga ginpahayag nga nadula ang amo indibidwal matapos nga nagpauli sa ila kag makuha kontani sang ginasagod sini nga baka.
Sa interview sang Bombo Radyo kay Broderick Train, head sang Antique Provincial Disaster Risk Reduction and Management Office, iya ginpahayag nga yara na lang sa 172 ka mga barangay ang naapektohan sang malain nga panahon sa kabug-usan nga Antique.
Suno kay Train, ang kalabanan sa mga banwa ang apektado sang baha kag landslides nga dala man sang habagat kag trough.
Ginpahayag man sini nga may mga dalan nga naapektohan sang landslides, apang ang iban nga national road ang posible naman nga maagyan subong.
Gintumod man sang natungdan nga apisar sang pagbalik sang iban nga mga residente sa ila nga puluy-an, may yara man sang iban nga nag-amat-amat man nga nagbalik sa evacuation center bangud nagapabilin nga wala malimpyohan ang ila nga panimalay.
Bukas man ang tanan nga evacuation center agud nga magtatap sa mga pamilya nga naapektohan sang pagbaha kag landslide.
