Masobra 200 ka mga preso ang napapauli na sa Russia kag Ukraine matapos nagsugtanay ang duha ka pungsod nga magpatigayon sang swap ukon bayluhanay sang prisoners of war.
May tag-103 ka mga preso halin sa magtimbang nga bahin ang nadala sa amo nga deal.
Sa Kyiv, suno kay President Volodymyr Zelenskyy, ang 103 Ukrainians nga napapauli ang lunsay halin sa military kun sa diin 82 ang soldado kag privates samtang 21 naman ang officers.
Sa Moscow naman, gin-report sang Russian Defence Ministry nga lunsay Russian soldiers ang 103 nga amo anay ang gin-preso sa border nga Kursk region kun sa diin nagpatigayon ang Ukrainian forces sang surprise incursion sang nagligad nga Agusto.
Ini nga bayluhanay sang mga preso ang ginpatung-an sang United Arab Emirates. Ini na ang ika-walo nga mediation nga nahimo sang amo nga Arab nation subong nga tuig.
Nahibaluan nga madamo nga beses na nga nagsugtanay ang Russia kag Ukraine sa prisoner swap halin sang nag-invade ang Moscow sang Pebrero 2022. Ang natabo sang weekend amo na ang ikatatlo halin sang ginpatigayon sang Kyiv ang cross-border incursion sa Kursk region sang Agusto.
