Ginpatpat sang isa ka abogado ang mga kaso nga ginapangatubang ni Kingdom of Jesus Christ (KOJC) Leader Pastor Apollo Quiboloy.
Ini amo ang Qualified Anti-trafficking in person, Child Abuse kag Rape.
Sa interview sang Bombo Radyo kay Atty. Joenar Pueblo, Bombo Abogado, iya ginpahayag nga ang Anti-trafficking in person nga kaso ni Quiboloy ang kasunod sang ginapahayag nga pagpang-abuso sini sa mga menor-de-edad, kon sa diin, gindala pa sa Estados Unidos ang mga biktima kag didto ginpang-abuso.
Suno kay Pueblo, gingamit man ang mga menor-ded-edad agud mangin “personal consumption” sang pastor bangud nagapati ang ila nga religious group nga ini ang parte sang ila nga religious duty.
Gin-athag man sini nga sa amo nga kaso, magasulod na ang paglapas sang pastor sa Child Abuse kag Rape.
Ginpahayag man sang natungdan nga bisan ano pa ka manggadan ang pastor, tubtob ang kaso nga trafficking ang may nabalhag nga “qualified” ini ang indi na posible nga mapyansahan pa.
Gintumod man sini nga ang danyos sa amo nga kaso ang indi magnubo sa P2 million kag indi maglapaw sa P5 million.
Nahibaluan nga sang Biyernes, Setyembre 13, nag-file sang motion si Quiboloy paagi sa iya abogado sa Pasig Regional Trial Court (RTC) Branch 159 nga isaylo ini sa isa ka ospital sa Davao City para ma-detain bangud sa wala matumod nga mga balatian.
