Naghiwat ang Malacañang sang concert kagab-i, Septyembre 15, agud nga suguran ang isa ka tuig nga countdown para sa maragtason nga pag-host sang Pilipinas sang FIVB Men’s Volleyball World Championship sa 2025.
Duha ka oras ang event nga gintawag nga “PH to Serve: A Concert for the One-Year Countdown to the Philippine Hosting of the FIVB Volleyball Men’s World Championship 2025.”
Gin-imbitar ang players sang national team nga Alas Pilipinas sa event nga ginpangunahan man mismo ni President Ferdinand Marcos, Jr.
Kaupod ni Marcos sa concert amo sanday First Lady Marie Louise Araneta-Marcos, Local Organizing Committee Co-Chair William Vincent Marcos, FIVB General Director Fabio Azebedo, Philippine National Volleyball Federation president Ramon “Tats” Suzara, Cabinet secretaries, government officials, kag iban pa nga mga atleta.
Lakip sa performers amo ang Filipino singers nga nagpasakop sa World Championships of Performing Arts amo man ang laser lights kag LED artists.
Matabo ang World Championship sa September 12 – 28 sa masunod nga tuig nga amo ang una nga bes nga maga-host ang Pilipinas kag una man nga tion sa bilog nga Southeast Asia.
Bilang host country, awtomatiko nga naka-qualify ang Pilipinas kaupod sa defending champion nga Italy.
Sa draw sang nagligad nga gab-i, nagtupa ang Pilipinas sa Pool A kun sa diin makasambuwa sini ang Iran, Egypt, kag Tunisia sa imbukada nga mga hampang.
