ILOILO CITY- Pilason ang mag-asawa matapos ginluthang samtang nagahiwat sang birthday party sa ila balay sa Barangay Jibao-an, Pavia, Iloilo.
Ang mga biktima amo sanday alyas June kag Mae samtang ang suspek amo si alyas Philip.
Sa interview sang Bombo Radyo kay Police Lieutenant Russell Husmalaga, Deputy Chief of Police sang Pavia Municipal Police Station, iya ginpahayag nga base sa imbestigasyon, birthday sang lalaki nga biktima rason nga may selebrasyon sa ila balay kag may nagakanta sa videoke.
Suno kay Husmalaga, may yara man sang nagainom sa pihak nga balay kun sa diin yara ang suspek nga paryente man lang sang mga biktima.
Ginpahayag ni Husmalaga nga samtang naga-videoke ang mga biktima pasado las-tres sa kaagahon, ginsaway ang mga ini rason nga ila ginkadtuan ang suspek kag didto natabo ang pagbaisay.
Ginsundan ini sang paggabot sang suspek sang pusil kag ginluthang ang mga biktima.
Naigo sa tiyan ang bana samtang naigo naman sa abaga ang asawa.
Madasig naman nga nalagyo ang suspek kag padayon pa nga ginapangita sang otoridad.
Ginabulong naman sa ospital ang mag-asawa.
