Ginpaidalum sa Blue Alert Status ang probinsya sang Iloilo kasunod sang nangin epekto sang Southwest Monsoon ukon hangin nga habagat.
Ini ang isa man ka pagpanghanda sa epekto nga dala sang habagat ilabi na sa mga lugar nga yara sa coastal areas.
Sa interview sang Bombo Radyo kay Ret. Col. Cornelio Salinas, head of the Provincial Disaster Risk Reduction and Management Office (PDRRMO), iya ginpahayag nga ini nga tikang ang nagapakita sang dugang nga kahandaan kag pagbantay, nga nagahingyo sa mga Local Government Units (LGUs) nga pabaskugon ang ila monitoring.
Suno kay Salinas, kinahanglan nga may mga tinawo sang Municipal Disaster Risk Reduction Management Office nga naka-standby kag aktibo nga naga-monitor sa mga sistema sang komunikasyon agud masiguro ang nagakaigo nga pag-update sa mga residente.
Kalabanan naman sa mga banwa sa probinsya nga naapektohan amo ang yara sa coastal areas lakip na ang Miag-ao nga may tatlo ka mga barangay nga apektado, banwa sang Guimbal nga may lima ka barangay, kag sa San Joaquin nga may apat ka mga pamilya.
Nahibaluan nga gina-activate lamang ang blue alert status agud mag-abiso sa mga Local Government Units nga pasangkaron ang ila monitoring agud malikawan ang casualties kag kahalitan.
