Nakarekord ang Iloilo City Disaster Risk Reduction Management Office (CDRRMO) sang 86 ka mga naguba nga panimalay sa syudad sang Iloilo sa kasagsagan sang bagyong Ferdie subong man sang epekto sang hanging habagat.
Sa interview sang Bombo Radyo kay Arvily Mae Jusden, Team Leader sang Iloilo City Operations Center, iya ginpahayag nga lakip sa mga tuman nga nabahaan amo ang Tanza Timawa II, City Proper kag Barangay Loboc, Lapuz, Iloilo City.
Suno kay Jusden, sa kabug-usan nga 86 ka mga naguba nga balay, apat diri ang totally damaged samtang 82 naman ang partially damaged.
Naapektohan naman sang malain nga tyempo ang 112 ka mga pamilya nga ginakabug-usan sang 444 ka mga indibidwal.
Anom naman ka mga barangay ang apektado sang moderate to heavy rainfall sa Iloilo City Proper, ini amo ang Brgy. General Hughes, Rizal Pala-Pala 2, Rizal Estanzuela, Ma. Clara, Rizal Ibarra, kag Ortiz.
Tatlo naman ka mga barangay sa Distrito sang Molo ang naapektohan sang habagat, ini amo ang North Baluarte, San Juan, kag Boulevard.
Apektado man ang Brgy. PHHC Block 17 kag Brgy. Guzman-Jesena sa Mandurriao, Iloilo City.
Samtang, may yara man sa mga damage nga panimalay sa Ticud, Lapaz, Tabuc Suba kag San Roque, Jaro.
