Ginsaysay sang crew sang BRP Teresa Magbanua nga sinemana sila nga nagsuprer sang kagutom kag kauhaw matapos nga ginbalabagan sang mga Chinese ang resupply missions nga magadala kuntani sang ila kinahanglanon samtang nagabantay sa Sabina Shoal ukon Escoda Shoal.
Kahapon, Septyembre 15, sang nag-abot sa Palawan ang barko sakay ang masobra 60 ka mga personnel nga lima ka bulan man nga nagtinir sa amo nga teritoryo sa West Philippine Sea.
Tatlo ka semana sila nga nagmantinir sang lugaw samtang yara sa barko. Ginpahayag ni Ensign Janey Anne Paloma, isa sa nakasakay sa Teresa Magbanua, nga ginbutangan lang nila ang lugaw sang pepper kag asin bangud amo na lamang ini ang nabilin sa ila.
Nasolusyunan ang ila kauhaw paagi sa tubig-ulan kag pag-filter sang tubig-dagat paagi sa freshwater generator. Magluwas diri, na-diskubrehan man sang ila chief engineer nga mahimo man nila mainom ang condensed water halin sa air conditioning unit.
Matandaan nga may suplay nga gin-airdrop sa ila sang Agusto 28, 2024 apang indi ini bastante. Ang amo nga petsa amo lamang ang isahanon nga tion nga madinalag-on nga napatigayon ang resupply mission halin sang gin-deploy ang BRP Teresa Magbanua sa Escoda Shoal sang Abril.
“Kapag tumagal pa kami, siguro doon mas marami na ang magkakasakit dahil na-expose na kami sa tubig na hindi healthy,” suno naman kay Lieutenant Commander Efren Duran, Jr., captain sang Teresa Magbanua. “May sumusuka na, may bowel movements na iba na talaga.”
Sa ila pag-abot sa Palawan kahapon, apat sa crew members ang gindala sa ospital bangud sa gastroenteritis, dehydration kag gout.
Magluwas pa ini sa pamahog sa ila safety bangud sa agresibo nga hulag sang China Coast Guard — halimbawa ang sulit-sulit nga pagbunggo sini sa Filipino vessel sang Agusto 31 nga nagtuga sang damage malapit sa engine room sang barko.
WALA NAGA-SURRENDER
Una na ginklaro sang Philippine Coast Guard nga wala sini gin-abandona ang teritoryo sang Pilipinas sa Escoda Shoal apisar ginpabalik na sa Palawan ang BRP Teresa Magbanua.
Suno kay Commo. Jay Tarriella, PCG spokesperson on the West Philippine Sea, natapos na sang Teresa Magbanua ang iya misyon nga amo ang pauntaton ang reclamation sa Escoda; protektahan ang marine environment; kag suportahan ang manugpangisda nga mga Pilipino.
Gindugang man sang Coast Guard officials nga “humanitarian” kag indi “political” ang ila desisyon nga bawion na ang barko matapos ang lima ka bulan nga pagbantay sa Escoda.
Ang Escoda nahamtang sa kalayuon nga 140 kilometers halin sa Palawan kag sulod pa sa exclusive economic zone sang Pilipinas.
Nangin kumplikado ang sitwasyon sang barko bangud sa pagpang-harass sang China lakip na ang natabo sang Agusto 31 nga makapila ka beses ini nga ginbungguan sang China Coast Guard vessels rason nga nakaangkon sang structural damage.
