Gin-ako ni Iloilo City Representative Julienne “Jam-jam” Baronda nga gulpiyada lang ang natabo sa Kamara nga pagbukas sini sang topiko nahanungod sa kaso ni Former Iloilo City Mayor Jed Patrick Mabilog.
Sa interview sang Bombo Radyo kay Representative Baronda, iya ginpahayag nga tuyo lamang sini nga mahatagan sang hustisya si Mabilog kag ang syudad sang Iloilo matapos nga na-tag bilang ‘most shabulized city’ ni Former President Rodrigo Duterte.
Suno kay Baronda, ini ang kahigayunan man agud mabatian ang bahin sang anay alkalde paagi sa Quad Committee Hearing rason man nga ginpapasa si Mabilog sang affidavit.
Gin-athag man sang mamalidha nga nakahimo naman sang affidavit si Mabilog apang indi sini matumod kon san-o ini igapasa sang anay alkalde.
Gintumod man ni Baronda nga ang iya ginhimo ang indi lang para kay Mabilog, kundi para sa mga tawo nga nabayolar ang kinamatarong sa likod sang war on drugs sang administrasyon ni Duterte.
Indi man matul-id sang natungdan kon magapadalagan si Mabilog kaupod siya sa palaabuton nga eleksyon, apang isa lang ang ginsigurado sini, amo ang klarohon ang pangalan sang anay alkalde.
Ginkalipay naman sang mamalidha ang pagpauli ni Mabilog sa pungsod bangud ini ang isa man ka kahigayonan agud nga maplastar sini ang iya hinun-anon sa pag-angot sa iya sa iligal nga droga.
