Magatanyag ang Iloilo City Government sang balay paagi sa Housing Program para sa mga masami nga naapektohan sang malain nga tyempo sa Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga prayoridad sang city government ang mga yara naga-istar sa coastal areas sang syudad ukon ang yara sa higad sang baybay.
Suno kay Treñas, kinahanglan na nga dugangan ang housing project sa Iloilo City, apang isa sa mga problema nga ginaatubang amo ang kinahanglan nga bayaran sang mga pamilya nga ma-istar diri.
Ginpahayag man sini nga ang isa man ka pagpanghangkat sa bahin sang mga informal settlers nga plano ipahamtang sa housing project bangud kalabanan sa ila ang wala sang ubra.
Gin-athag man sang natungdan nga gintinghuwaan sang lokal nga pamunuan nga mapa-enroll ang mga benepisyaryo sa Pag-IBIG Fund agud nga makaambit man sila sang bag-o nga puluy-an nga malayo sa kalamidad.
Nahibaluan nga may yara sang 240 pa ka mga units sang balay ang mahimo nga magamit sang mga informal settlers nga pagahamtang sa lugar.
