Maabtik nga ginklaro ni anay Philippine National Police chief kag subong senador nga si Ronald “Bato” dela Rosa ang iya pangalan nga indi siya ang anay hepe sang Philippine National Police nga ginatumod nga amo ang nagabaton sang ‘bribe’ kag nagbulig kay Alice Guo nga magpalagyo sa Pilipinas.
Ini kadungan sang ginpatigayon nga probe sa Senate panel on women.
Kasunod ini sang pagbuyagyag ni Pagcor senior vice president Raul Villanueva nga isa ka former PNP chief ang ginaalegar nga nagabaton sang bribes agud buligan si Guo ukon si Guo Hua Ping, kag iya kaupod nga sanday Shiela kag Wesley Guo nga magpalagyo apisar nga yara ang mga ini sa immigration lookout bulletin.
Sa hearing, direkta nga ginpamangkot ni dela Rosa si Guo kun siya ang ginatumod nga former PNP chief kag kun may yara sang maggwa nga script nga si Bato ang nagabaton sang kwarta halin sa dismissed mayor kag nagsabat naman si Guo nga wala sang kasubong nga natabo.
Pila ka beses man nga ginpamangkot sang senador si Guo kun kilala niya ini sang personal kag kun nakakitaay na sila kag ang sabat ni Guo amo nga indi niya ini kilala kag wala pa sila nagkitaay personal ni dela Rosa.
