Dako ang pasalamat sang pila ka Agrarian Reform Beneficiaries (ARB’s) matapos nga nakabaton sang Certificates of the land Ownership Award (CLOAs) halin sa Department of Agrarian Reform (DAR).
Ini ang ginpangunahan man ni Presidente Ferdinand Marcos Jr. sa Passi City Arena.
Sa interview sang Bombo Radyo kay Lorna Catolico, residente sa Dingle, Iloilo kag Agrarian Reform Beneficiary, iya ginpahayag nga madugay na nila nga ginahulat ang titulo sang duta antes ini nga natigayon nga nag-abot.
Suno kay Catolico, dako ang iya pagpasalamat kay Presidente Marcos sa nangin bulig sini agud nga makuha nila ang ila nga duta.
Ginpahayag man sang natungdan nga gamiton nila ang duta agud nga tamnan kag mangin palangabuhian.
Nahibaluan nga nabaton ni Catolico ang 1-hectare nga duta lakip man ang pila ka benepisyaryo nga naggikan sa Aklan, Antique, Capiz, Iloilo kag Guimaras.
Naglab-ot sa 2,588 ka mga titulo sang duta nga may 2,643.5236 hectares ang ginpanghatag sa tanan nga benepisyaryo.
