Nagpasalig ang Philippine Charity Sweepstakes Office (PCSO) nga dugangan pa ang mga makabaton sang Patient Transport Vehicle sa Western Visayas.
Sa interview sang Bombo Radyo kay Imelda Papin, myembro sang Board of Directors sang Philippine Charity Sweepstakes Office, iya ginpahayag nga nagalibot sila sa bug-os nga pungsod agud nga personal nga mahatag ang Patient Transport Vehicle.
Suno kay Papin, ang distribusyon sang amo nga proyekto ang magaagi sa tagsa ka Local Government Units (LGUs) sang kabanwahanan sa rehiyon.
Ginpahayag man sini nga tuyo sang talatapan nga malab-ot ang mga lugar nga yara sa malayo sa syudad.
Gintumod man sang natungdan nga mangin dako nga bulig ang ginhatag nga mga ambulansya agud matatapan ang mga nagakinahanglan nga komunidad.
Nahibaluan nga yara sa 51 ka mga Patient Transport Vehicle sang PCSO ang natigayon nga nahatag sa nagkalain-lain nga probinsya sa Western Visayas.
