Nabuligan sang Philippine Coast Guard (PCG) ang tatlo ka mga manugpangisda nga sakay sa isa ka motorbanca nga nagkapan sa Barangay Bayas Island, Estancia, Iloilo.
Sa report sang PCG, ginpahayag nga natabo ini kahapon, Septyembre 19, kun sa diin involved ang M/banca Neneng Jed.
Nagluntad ang insidente bangud sa mamadlos nga hangin kag mabaskog nga hampak sang balod nga dala sang Habagat.
Suno sa PCG, matapos nabaton sang ila talatapan ang report, gin-activate insigida sang Coast Guard Sub-Station (CGSS) Estancia ang ila nga Deployable Response Team (DRT). Kaupod sa Special Operations Unit (SOU) Northern Iloilo, nagsakay ang team sa M/banca Aliah Diel agud mag-conduct sang search and rescue (SAR) operation.
Kasunod sini, safe nga na-transfer ang tatlo ka manugpangisda sa sakayan kag yara na subong sa maayo nga kondisyon.
Ginbuligan man nga mabutong ang distressed nga motorbanca pabalik sa baybayon sa Estancia.
Magluwas diri, ginhatagan man ang mga manugpangisda sang kinilo nga bugas halin sa CGSS Estancia antes ginpapauli sa ila tagsa ka balay.
