Nagalaum ang Jalandoni Memorial National High School nga gilayon matapos ang mga proyekto nanday Iloilo City Mayor Jerry Treñas kag Lone District Representative Julienne “Jam-jam” Baronda sa ila nga eskwelahan.
Sa interview sang Bombo Radyo kay Arlene Joy Alonzaga, Principal III sang Jalandoni Memorial NHS, iya ginpahayag nga on process na nga ginatukod ang tatlo ka mga building para sa sports events.
Suno kay Alonzaga, ginalauman sang buluthuan kag sang Department of Education (DEPED) nga matapos ang sports center bangud dako ini nga bulig para sa mga estudyante nga atleta.
Ginalantaw man sang natungdan nga makabulig ang proyekto sa tuigan nga city meet.
Nagpasalig man ang manunudlo nga on going ang ila monitoring sa proyekto, kon sa diin, nagpahayag ang Department of Public Works and Highways (DPWH) nga posible matapos ang proyekto sa masunod nga tuig.
Nahibaluan nga magkaupod sanday Mayor Treñas kag Representative “Jam-jam” Baronda nga nagpatigayon sang groundbreaking sa amo nga proyekto sang nagligad nga 2022.
