Magalawig sang duha tubtub tatlo ka bulan ang pagkay-o sa BRP Teresa Magbanua, ang barko sang Philippine Coast Guard (PCG) nga nagabantay anay sa Escoda Shoal sa West Philippine Sea nga ginpabalik na sa Palawan sang nagligad nga semana.
Madugay ang repair bangud sa mga guba tuga sang mga insidente kun sa diin pila ka beses ini nga ginbungguan sang mga barko sang China sa sulod sang lima ka bulan sini nga pagbantay sa shoal.
Naka-angkorahe ini subong sa Danao, Cebu kun sa diin gina-kay-o ang mga buho sa superstructure kag hull.
Ang damage ang natabo matapos hungod nga ginbunggu-an sang mga barko sang China Coast Guard (CCG) kag Chinese maritime militia ang barko sang Philippine Coast Guard samtang naga-patrolya ini sa West Philippine Sea.
“The ship is still under warranty from Mitsubishi so they will be doing the repairs…and our local shipbuilders in Danao will be undertaking the repair,” suno kay PCG spokesperson Rear Admiral Arman Balilo.
Magluwas sa Magbanua, ginakaayo man sa Cebu ang duha ka patrol vessels sang PCG nga BRP Bagacay kag BRP Cape Engaño. Ini nga vessels ang na-damage kasunod man sang pagpang-harass sang China sa Escoda Shoal sang Agusto 19.#
