Gindayaw sang kadam-an ang ginpakita nga ‘honesty’ sang isa ka taxi driver matapos nga gin-uli sini ang bag nga naga-unod sang P200,000 nga kantidad sang kwarta.
Ang taxi driver amo si James Palma, 57-anyos, residente sang Bolilao, Mandurriao; samtang ang Retired Army amo si Jeorge Limjuco sang Pandac, Pavia, Iloilo.
Sa interview sang Bombo Radyo kay Palma, iya ginpahayag nga wala na siya nagbukad kon ano ang unod sang bag kag tuyo lamang sini nga mabalik gilayon sa tag-iya.
Suno kay Palma, gilayon sini nga gindala ang bag sa Bombo Radyo Iloilo bangud nagapati siya nga madamo sang mga nagapamati diri kag agud gilayon man nga ma-turn over sa nagapanag-iya.
Gintumod man sang taxi driver nga nagsakay ang pasahero halin sa St. Paul’s Hospital kag nagpadul-ong sa Iloilo Grand Hotel sa Iloilo Central Market.
Gin-athag man sini nga wala siya sang tuyo nga kuhaon ang kwarta bangud nabilin lamang ini sa taxi kag indi siya ang nagapanag-iya diri.
Nahibaluan nga ini ang labing-una nga kahigayonan nga may nabilin sa iya taxi nga ginamaneho.
Indi matupungan ang kalipay nga nabatyagan sang retired Philippine Army matapos nga ginbalik sang isa ka taxi driver ang iya nadula nga kwarta.
Sa interview sang Bombo Radyo kay Limjuco, nagapanag-iya sang bag, iya ginpahayag nga halin siya St. Paul’s Hospital matapos nga nagpa-laboratory, kon sa diin, matapos ini, nagsakay siya sa taxi.
Suno kay Limjuco, wala sini natalupangdan nga nabilin sini ang iya bag sa sulod sang taxi matapos ini nga nagpanaog sa Iloilo Grand Hotel malapit sa Iloilo Central Market.
Ginpahayag man sang natungdan nga dako ang iya nga pagpasalamat sa taxi driver nga si James Palma bangud sa iya ginpakita nga “honesty”.
Gintumod man sini nga samtang nagalakat na siya, idto sini nga nadumduman nga wala na ang iya bag.
Nagpasalamat man ang anay militar sa Bombo Radyo bangud nangin palaagyan ini agud nga mabalik ang iya nga kwarta.
