Dismayado ang Regional Drug Enforcement Unit (RPDEU) 6 sa management sang Iloilo Fish Port Complex sa indi pagkooperar nga ipaidalum sa drug test ang mga construction workers sa ila barracks.
Sa interview sang Bombo Radyo kay Police Captain Ryan Chris Inot, Team Leader sang Regional Drug Enforcement Unit 6, iya ginpahayag nga nag-resign ang tanan nga mga nakapalagyo nga trabahador sang nahibaluan nila nga ipaidalum sila sa drug test.
Suno kay Inot, daw kaangay lang nga may ginatago ang management bangud indi ini magpahanugot nga ipa-drug test ang mga construction workers.
Ginpahayag man sini nga ginpangguba ang mga barracks sa lugar bangud indi na luyag sang kontraktor nga himuon ini liwat nga drug den.
Gintumod man sang natungdan nga lunsay mga pangayaw ang mga durugista rason man nga ginpangguba ang barracks agud nga mapahalin na sa lugar.
Gin-athag man ni Inot nga priority lamang sang talatapan nga madakop ang mga nagabaligya sang iligal nga druga sa sulod sang management agud nga mauntat na ang iligal nga transaksyon.
