Gin-turn over na sa City Social Welfare and Development Office (CSWDO) ang apat ka mga kabataan nga na-rescue sang otoridad matapos nangransak sa Public Order and Safety Management Office (POSMO) sa Peralta St., Iloilo City Proper.
Base sa record sang Police Station 1, duha sa na-rescue ang naga-edad sang nueve anyos, isa ang 11-anyos, kag isa ang 13-anyos.
Sa interview sang Bombo Radyo kay Police Captain Roque Gimeno III, hepe sang Police Station 1, iya ginpahayag nga may isa pa nga involved nga amo ang ginatudlo nga lookout apang wala ini sa ila barangay bangud posible nga may ginkadtuan sang ginsugat sang pulis.
Base sa inisyal nga report suno kay Roque, ang 11 kag 13-anyos nga bata ang nagsulod sa opisina kag nagkuha sa laptop.
Natigayon nga nakilala ang mga menor de edad bangud sang ginsulod nila ang opisina, ginhampangan nila ang DSLR camera, nakuhaan sila sang pictures, apang wala nila ini nadala sang nagpalagyo na sila.
Ginapahayag nga alas-11 sang aga sang Sabado nila ginsulod ang POSMO, kag nagbalik pa alas-kuwatro sang hapon sang Domingo kag ginkawat ang pila ka gadgets.
Nabawi man ang items nga ila ginpangkuha lakip ang cellphone kag laptop.
Sa inisyal nga impormasyon, magapatigayon sang community service ang na-rescue nga mga indibidwal.
Una na nga nagmandu si Mayor Jerry Treñas kay Iloilo City Police Office director Police Colonel Kim Legada nga hatagan gid sang dako nga atensyon ang pagpadalom sa insidente ilabi na nga involved ang opisina sang gobyerno.
