Nasapwan sang jail officer nga nagabitay kag wala na sang kabuhi sa sulod sang presohan ang subject sa ginkasa nga sa buy-bust operation sang Lambunao Municipal Police Station (MPS).
Ang subject amo si Alyas Jay-R.
Sa interview sang Bombo Radyo kay Police Major Roy Tayona, hepe sang Lambunao Municipal Police Station, iya ginpahayag nga antes natabo ang insidente, nagareklamo na nga daan ang subject nga nagalain ang iya pamatyag, rason nga gilayon ini gindala sa ospital agud ipa-check up.
Suno kay Tayona, natumod sang doktor nga mataas ang blood pressure sang biktima.
Gintul-id man sang natungdan nga sang ginbalik na ang biktima sa selda, makaligad lamang ang pila ka minutos, gin-utas sini ang iya kabuhi gamit ang habol nga ginhatag sang iya iloy sang adlaw nga nadakpan ini sa buy-bust operation.
Gintinguhaan pa nga salbaron ang subject kag gindala sa ospital, apang ginbawian gid ini sang kabuhi.
Nahibaluan nga nagaisahanon lamang ang biktima sa iya selda sang natabo ang insidente.
Kon balikan, sang Setyembre 22, 2024, na-recover ang P34,000 nga balor sang suspected shabu sa amo nga subject.
