ILOILO – Ginahitso na sang ruling party nga Partido Federal ng Pilipinas (PFP) ang posible nga pagbunggu-anay sa 2025 midterm elections sang ila mga myembro kag mga kaalyado sa partido.
Sa interview sang Bombo Radyo kay Defensor, Vice President for the Visayas kag concurrent Regional Chairman sang ruling party, iya ginpahayag nga indi malikawan nga may mga kaalyado sila nga magaatubangay sa lokal nga posisyon nga amo subong ang ila ginapangitaan sang solusyon.
Suno kay Defensor, ginpasigurado mismo ni President Ferdinand Marcos, Jr., nga nagapatigayon sila sang koordinasyon agud mapatuman ang malinong nga piniliay.
Nahibaluan nga nag-angkon sang coalition ang ruling party sa Lakas-CMD, National Unity Party, National People’s Coalition kag NationalistA Party.
Ang pagtililipon sang mga myembro sang alyansa ang patigayunon naman sa Setyembre 26.
