SAN JOAQUIN, ILOILO – Patay ang isa ka motorista matapos naaksidente ang ginasakyan sini nga motorsiklo sa Barangay Cata-an, San Joaquin, Iloilo.
Ang biktima amo si James Sevilleno, 50, residente sang nasambit nga lugar.
Sa interview sang Bombo Radyo kay Police Staff Sergeant Jessan Esguerra, imbestigador sang San Joaquin Municipal Police Station, iya ginpahayag nga naghalin ang biktima sa ila balay kag padulong kuntani sa banwa.
Suno kay Esguerra, nadulaan sang kontrol ang biktima sa iya motorsiklo sa diin wala pa ini sang suksok nga helmet.
Tungod sini, nahulog ang biktima sa kanal sa diin nag-angkon ini sang pilas sa ulo nga amo ang gintunaan sang iya kamatayon.
Gindala pa sa ospital ang biktima, apang gindeklarar sang doctor nga dead on arrival.
