Nagapati si Iloilo City Councilor Miguel Treñas nga qualified si Atty. Sheila Olid agud nga magtal-os sa nabakante nga pwesto ni Sheen Marie Mabilog sang ila team sa 2025 midterm elections.
Sa interview sang Bombo Radyo kay Councilor Treñas, iya ginpahayag nga sugod sang nag-abot si Former Iloilo City Mayor Jed Patrick Mabilog sa syudad, wala na nila napag-angotan si Sheen Mabilog agud nga maistorya.
Suno kay Treñas, sa ila nga pinakaulihi nga pakig-istorya kay Mabilog, indi pa ini sigurado kon magapadalagan sa 2025 midterm elections.
Gin-athag man sini nga sigurado na sila sa pagpili kay Atty. Sheila Olid apisar kon ano pa ang mangi desisyon ni Sheen Marie Mabilog.
Gintumod man sang natungdan nga wala nakaistorya si Mabilog sa iya utod nga si Raisa Treñas-Chu kag kay Iloilo City Mayor Jerry Treñas sa iya desisyon nga maghalin sa ila nga linyada.
Nagalaum naman si Treñas nga makaistorya liwat kay Mabilog agud nga maklaro ang desisyon sini.
Ginarespeto naman sang ila grupo ang nangin desisyon sang anay executive assistant to the Mayor nga si Sheen Marie Mabilog.
