Ginkumpirma sang Iloilo City Commission on Elections (COMELEC) nga sa Oktubre 8, 2024 maga-file sang certificate of candidacy (COC) ang kampo ni Iloilo City Mayor Jerry Treñas.
Sa interview sang Bombo Radyo kay Mr. Jonathan Sayno, election assistant II sang city COMELEC Office, iya ginpahayag nga ginapamangkot nila anay ang mga kandidato kon san-o nila tuyo nga mag-file agud nga makaprepar ang ila talatapan sang dugang nga security.
Suno kay Sayno, ginkumpirma sang kampo ni Treñas ang napetsahan nga schedule kag ini ang pinal na.
Gin-athag man sini nga kinahanglan nga magkuha sang permit ang mga kandidato halin sa Local Government kon magpatuman sila sang caravan.
Indi paman matumod sang natungdan ang petsa kon san-o maga-file ang team nanday Iloilo City Lone District Representative sang certificate of candidacy, apang, ginsaysay sini nga posible sa masunod nga semana.
Ginpasigurado naman sang talatapan nga indi magkitaay ang duha ka kampo kon hinali nga magdungan sila file sang certificate of candidacy kon sa diin, iga-isolate anay ang isa ka grupo sa isa ka kwarto tubtob indi pa makatapos ang nauna nga team.
