Ano ang paminsaron kag batyagon mo kun pahilabtan kag ihaboy sang iban nga mga tawo ang bagay nga ginahalungan kag ginapabaloran?
Mahimo nga maakig ka gid ukon magpanukot, apang ano abi kun si Nanay mo ang nakahimo sini?
Amo ini ang natabo sa isa ka 20-anyos nga soltero sa Taiwan nga mahilig gid sa paghupot sang mga komiks.
Nagapuyo ang lalaki kaupod sa iya 64-anyos nga iloy sa Chiayi City, Taiwan.
Natak-an na ang nanay bangud nga naga-damo nga naga-damo ang comic collection sang iya anak, kag pamatyagan niya naga-gutok na ang ila balay.
Isa ka adlaw, samtang nagapanglimpyo ang iloy, nakit-an sini ang 32-volume nga “Attack on Titan” manga collection sang iya bata. Nanotisyaran sini nga daw daan na kag medyo basa pa ang mga libro gani nag-mato-mato siya nga i-recycle ini kag ihaboy ang iban para nga magligwa na.
Wala na siya nagpamangkot sa iya bata kun okay lang, gani nga sang nag-abot ang bata, amo na lang ang kaakig sini sa iya nanay.
Sa sobra niya nga kalain sang buot, nagpatawag pa siya sang pulis.
Sang ulihi, indi pa gid madala sa istorya ang bata, kag ginpasaka pa gid sini sa korte ang reklamo bangud suno sa iya, ginguba ang iya propiedad nga wala sang pahanugot halin sa iya.
Base sa argumento sang bata, ang “Attack on Titan” ang isa ka tuman ka popular nga manga gani pat-od nga mabudlay na makapangita sang kumpleto nga collection bangud wala na gani sang print sang 32 volumes bangud makabig na ini nga collector s items.
Nagrason man ang nanay nga medyo basa naman ang manga volumes kag nagapagutok lang sa ila balay.
Nagpahayag pa ini nga kun pwede, istoryahan na lang nila ini nga duha apang nagpamalibad ang bata.
Pebrero pa natabo ang insidente apang subong lamang nagpaguwa sang desisyon ang Chiayi District Court.
Ginmultahan ang nanay sang 5,000 Taiwanese dollars ($160 ukon masobra P8,900) bangud sa property damage. Ini nga sentensya ang mahimo ma-commute sa community service.
Suno sa korte, indi husto nga wala sini gintahod ang property rights sang iya bata.
Ang malala suno pa sa Taiwanese media, tubtub subong, nagalain gihapon ang buot sang bata kag wala ini sang gana nga magpakig-istorya sa iya iloy matapos ang ginhimo sini sa iya paborito nga manga collection.#
