Ginreklamo sang mga residente sang Brgy. Baldoza, La Paz, Iloilo City ang isa ka lalaki nga nagapinalupok sang iya nga armas.
Sa interview sang Bombo Radyo kay alyas “Nene”, residente sang Brgy. Baldoza, La Paz, Iloilo City, iya ginpahayag nga madulom ang ila nga alagyan kon sa diin, naghingyo man ini nga butangan sang streetlights bangud nagakahangawa sila nga maigo sang bala kon hinali nga magpalupok ang ginareklamo nga lalaki.
Suno kay Nene, masami nga sa amo nga alagyan nagatambay ang lalaki rason man nga indi sini luyag nga butangan sang streetlights sa lugar.
Ginpahayag man sini nga bag-o lang sa ila lugar ang lalaki kag nakabakal lang sang duta.
Santo naman sa summon nga ginpasaka sang residente sa ila barangay, ginkilala ang lalaki nga si Ronnie Arcenal.
Nahibaluan nga indi magnubo sa tatlo ka lupok ang masami nga mabatian sang mga residente kon magpalupok sang armas si Arcenal.
Ginpanginwala naman sang hepe sang Iloilo City Police Station 2 nga ginaprotektahan sini ang ginareklamo nga lalaki sa nasambit nga lugar.
Suno kay Police Captain Marlon Perez, kon mapamatud-an nga nagpalupok gidman si Arcenal, ila gilayon nga kuwaon ang pusil sini kag arestohon.
Gin-athag man sang natungdan nga indi niya tinawo ang lalaki kag wala sila sang may nabaton nga report nahanungod sa insidente.
Ginpahayag man ni Perez nga sang nagpadulong sila sa lugar, naistorya niya si Arcenal kon sa diin, wala sang may natabo nga komosyon kag nabatian nga lupok.
Ginklaro man sini nga ang gintawag sa ila nga talatapan amo ang nasiplatan nga duha ka tawo nga nakasusok sang jacket kag makaduluda ang ila akto, kon sa diin, wala man nakit-an sang kapulisan.
