Nagapati si Department of Public Works and Highways (DPWH) Region 6 Regional Director Sanny Boy Oropel nga ‘most qualified ‘ ang International Builders Corporation agud nga ubrahon ang phase 2 sang kontrobersyal ng Ungka Flyover sa Pavia, Iloilo.
Sa interview sang Bombo Radyo kay Oropel, iya ginpahayag nga kon matapos ang tanan nga post evaluation sa masunod nga semana, posible nga makonsiderar nga kwalipikado ang nasambit nga korporasyon.
Suno kay Oropel, sa tanan nga mga structures nga ginaubra sang IBC, wala ini sang may nakita nga problema.
Gintumod man sini nga kon may problema man, ini ang plano indi ang mga tawo sang regional office nga naga-implementar sang proyekto.
Gin-athag man sang natungdan nga confident ang talatapan sa IBC kag kon mahatagan man sila sang tsansa sang publiko, indi nila luyag nga maguba ang ila pangalan bangud sa proyekto, rason man nga tinghuwaan nila ini nga mangin madinalag-on.
Nahibaluan nga una nga ginpasalig sang DPWH ang publiko nga buksan sa full capacity sa mga motorista ang Ungka Flyover sa Disyembre 25, 2024, adlaw sang Paskwa.
