Ginkumpirma sang Armed Forces of the Philippines (AFP) nga gin-ikugan sang China ang joint sea and air activities sang Pilipinas, Australia, Japan, kag New Zealand sa West Philippine Sea.
Suno kay Col. Francel Margareth Padilla, AFP spokesperson, may Chinese navy vessels nga nakit-an sa lugar sang exercise apang nagpadayon ang multilateral exercise nga wala ginpahilabtan ukon ginbanggaan sang China.
“While there were observations of PLAN vessels tailing during the MMCA, no reports were received regarding the conduct of the alleged Chinese military exercise,” suno kay Padilla.
Sa amo nga drills, ginpadala sang Pilipinas ang BRP Antonio Luna (FF151), BRP Emilio Jacinto (PS35), ang AW109 helicopter, kag ang Philippine Air Force Search and Rescue (SAR) assets.
Yara man sa drills ang USS Howard (DDG83) sang US Navy, HMAS Sydney (D48) sang Australia, JS Sazanami (DD113) sang Japan, kag HMNZS Aotearoa (A-11) sang New Zealand.
Lakip naman sa ginpanghimo amo ang pre-sail briefings, communication exercises (COMMEX), cross-deck exercises, division tactics/officer of the watch (Divtacs/OOW) drills, photographic exercises (PHOTOEX), replenishment at sea (RAS) approaches, maritime domain awareness (MDA) exercises, kag contact reporting.
Tanan ini ang ginpatigayon agud mas mapaayo pa ang operational readiness kag collaborative capabilities sang nasambit nga mga pungsod.
Una na nga ginpahayag sang China nga nagpatrolya man sila malapit sa Scarborough Shoal sa West Philippine Sea.
Suno sa Beijing, ang ila People’s Liberation Army (PLA) Southern Theater Command ang nag-organisa sang routine reconnaissance, early warning, kag sea-air patrol exercises malapit sa ila Huangyan Island.
Nagpalabtik pa ini nga may mga pungsod nga nagadabok sang gamo sa amo nga kadagatan nga nagatuga sang tension sa rehiyon.
Pahayag sini, nagapabilin sila nga naka-high alert para nga madepensahan ang ila national sovereign security kag maritime rights kag para nga mapabilin ang kalinong sa teritoryo.#
