ILOILO – May napilian na si Iloilo Gov. Arthur Defensor, Jr., nga mangin running mate sa May 2025 midterm elections.
Ini amo si Anilao, Iloilo Mayor Lee Ann Debuque.
Sanday Defensor kag Debuque ang lunsay katapo sang ruling party nga Partido Federal ng Pilipinas (PFP).
Nahibaluan nga si President Ferdinand Marcos, Jr., amo ang nagaserbe nga Chairman sang nasambit nga Partido.
Samtang si Defensor naman ang nagaserbe nga Vice President for the Visayas kag Regional Chairman sang partido.
Sa interview sang Bombo Radyo kay Debuque, iya ginakabig nga dako nga kahigayunan nga mapilian ni Defensor nga mangin running mate.
Suno kay Debuque, indi siya makapangindi sang ginpili ni Defensor nga mangin running mate sa diin gin-ako sini nga nakabatyag siya sang kulba, apang wala sang pangduha-duha.
Ginpahayag ni Debuque nga kaangay ni Defensor, isa man siya ka ‘Iskolar ng Bayan’ sa diin parehos sila nga nagtapos sang kolehiyo sa University of the Philippines (UP).
Samtang suno naman kay Defensor, ginakabig sini nga isa ka competitive, dynamic kag mapisan nga lider si Debuque.
Sa pihak nga bahin, gin-athag naman ni Iloilo 4th District Rep. Ferjenel Biron nga antes nagsumpa si Debuque sa ruling party, nagpangayo anay ini sang pahanugot kay Senator Cynthia Villar nga mabiya ini sa Nacionalista Party (NP).
Nahibaluan nga ang NP amo ang ‘oldest political party’ sa Pilipinas kag Southeast Asia sa diin ang Chairman sang Partido amo si Villar.
