Plastado na ang deployment sang mga personnel sang Police Regional Office 6 sa pagsugod sang filing sang certificate of candidacy sa Oktubre 1 kag magalawig sa Oktubre 8.
Sa interview sang Bombo Radyo kay Police Brigadier General Jack Wanky, director sang Police Regional Office 6, iya ginpahayag nga kabilugan nga 3,265 ang i-deploy nga pwersa sa nagkalain-lain nga COC filing areas sa rehiyon.
Base sa deployment plan, 931 personnel ang i-deploy sang Iloilo Police Provincial Office sa 97 tanan ka COC filing areas; 706 ang iya sang Negros PPO sa 62 areas; 397 ang iya sang Capiz PPO sa 34 areas; 363 ang iya sang Antique PPO sa 40 ka areas; 344 ang iya sang Aklan PPO sa 36 areas; 201 ang iya sang Iloilo City Police Office sa 12 ka areas; 186 sa Bacolod City sa 4 ka areas; kag 137 sa Guimaras PPO sa 10 ka areas.
Suno kay Wanky, nagapakig-angot man sila sa Commission on Elections para sa iban nga mga concerns may kaangtanan sa filing sang COC nga kinahanglan ang presensya sang kapulisan.
