Natigayon na nga nakit-an ang menor-de-edad nga babaye matapos nga na-missing kag nakalab-ot sa Cadiz City, Negros Occidental.
Ang biktima amo si alyas “Jewel”, 14-anyos, kag residente sang Dingle, Iloilo.
Sa interview sang Bombo Radyo kay Mylene Magbanua, iloy sang biktima, iya ginpahayag nga Setyembre 18, 2024 sang nadula ang biktima kag wala nakapauli sa ila puluy-an sa sulod sang duha ka semana.
Suno kay Magbanua, sa amo nga adlaw, wala na natapos sang iya anak ang iya klase sa ila eskwelahan sang ini ang nadula.
Gintumod man sini nga ang pinakaulihi nila nga pag-istoryahanay, amo sang nagpangayo si alyas “Jewel” sa iya sang P50 agud idugang bakal sang kinahanglanon sini sa iya buluthuan.
Gin-athag man sang iloy nga wala sang nobyo ang iya anak kag wala man ini sang may na-obserbahan nga ka-chat ukon masami nga makaistorya sang bata.
Sa subong, yara na sa paghinakop sang Department of Social Welfare and Development (DSWD) ang menor-de-edad kag ginalauman nga i-turn-over sa iya ginikanan.
Wala naman sang senyales nga gin-abuso ang menor-de-edad, apang santo sa inisyal nga paglantaw sang Women and Children Protection Desk sang Cadiz City Police Station, naglayas ang estudyante.
