Gina-ekspektar na nga daan ni Iloilo 5th District Representative Raul “Boboy” Tupas nga may yara na nga ginpili si Iloilo Governor Arthur Defensor, Jr. bilang bise-gobernadora sa 2025 midterm elections.
Sa interview sang Bombo Radyo kay Rep. Tupas, iya ginpahayag nga ginarespeto niya ang nangin desisyon ni Defensor nga pilion si Anilao, Iloilo Mayor Lee Ann Debuque.
Suno kay Tupas, nagapati diya nga nangin desisyon man ini sang mga mataas nga lideres nga yara sa partido ni Defensor.
Gin-ako man sini nga nagpakita siya sang interes nga magpapili, kon sa diin, nagapadulong ini sa opisina ni Iloilo 4th District Ferj Biron agud makig-istorya.
Ginakabig man sini si Biron nga isa ka ‘mentor’ kon sa diin, ginlaragway niya nga ‘loyal’ ang iya relasyon sa mamalidha.
Gin-athag man ni Tupas nga sa makapila ka beses nga nag-updanay sila ni Biron, wala gid siya nakabaton sang pormal nga pagpahibalo nga may napilian na sila bilang bise-gobernador ni Defensor.
Nagalaum kontani ang natungdan nga bisan gamay lang nga respeto ang napakita sa iya antes nga nagdihon sila sang pinal nga desisyon.
Nahibaluan nga anay nangin kaupod ni Tupas si Biron sa Nacionalista Party apang sa ulihi nga bahin, nagsaylo si Tupas sa Lakas–Christian Muslim Democrats ukon Lakas–CMD nga ginapangunahan ni House Speaker Martin Romualdez.
