ILOILO – Hugot nga seguridad ang ginapatuman sang kapulisan sa tagsa ka mga venue sang certificate of candidacy (COC) para sa mga kandidato sa syudad kag probinsya sang Iloilo.
Para sa mga kandidato sa syudad nga maga-file sang ila COC ang venue amo ang Robinson’s Place Main sa Iloilo City Proper, samtang sa Festive Walk Mall naman ang para sa mga taga kandidato halin sa Iloilo Province.
Sa interview sang Bombo Radyo kay Police Captain Michael Tuburan, Ground Commander sang Iloilo City Police Station No. 7, iya ginpahayag nga tatlo lang ka mga upod ang ila ginapasugtan sa tagsa ka mga kandidato nga maga-file sang COC sa Iloilo City.
Wala naman ginapasugtan ang pagdala sang mga armas sa sulod sang mall magluwas lang sa mga pulis.
85 naman ka mga pulis ang gin-deploy sa sulod mismo sang nasambit nga mall.
Samtang suno naman kay Police Col. Bayani Razalan, director sang Iloilo Police Provincial Office, iya ginpahayag nga nagpahamtang sila sang police assistance desk.
Suno kay Razalan, walo ka mga pulis ang ila gin-assign sa sulod sang ila ginabantayan nga mall.
Samtang sa mga tagsa ka police station sa banwa, ginmando sang natungdan nga indi dapat magnubo sa anom ang mga pulis nga magabantay.
