Ginkumpirma sang Commisson on Election (COMELEC) Province of Iloilo nga nakabaton sila sang sulat halin kay Ajuy Mayor Jett Rojas nga nagapanugyan nga ilakip ang banwa sa election watchlist areas.
Sa interview sang Bombo Radyo kay Atty. Renier Layson, Provincial Election Supervisor IV- COMELEC Province of Iloilo, iya ginpahayag nga napalab-ot na sini kay Iloilo Police Provincial Office (IPPO) Director Police Colonel Bayani Razalan ang sulat.
Suno kay Layson, tuman pa ka temprano agud nga i-categorize ang banwa sang Ajuy sa watchlist area bangud kinahanglan anay nga magtipon sang proper information, statistics, data, kag validation.
Gintumod man sini nga lakip ini sa ila ginasunod nga mga parameters sang COMELEC antes mag-impelementar sang isa ka tikang.
Nagpasalig man ang natungdan nga iga-endorse ang sulat ni Rojas sa kapulisan agud mapaidalum sa validation kag matumod ang claims nga nagakatabo sa amo nga banwa.
Tun-an naman sang Iloilo Police Provincial Office ang request nga ginpadala ni Rojas agud matumod kon malakip ang Ajuy sa ila watchlist areas.
Suno kay IPPO Director Police Colonel Bayani Razalan, nabaton nila ang sulat, apang, kinahanglan anay ini nga ipaidalum sa maid-id nga pagtuon sang Joint Peace and Security Coordinating Center sang ila talatapan.
